Transport
Metanes l’añu 1894 inaugurábase’l ramal de vía normal española ente Soto Rei y L’Entregu de la Compañía del Norte, que permitía la conexón direuta del valle d’El Nalón col interior del país. La construcción de grandes pozos verticales d’estraición d’hulla na segunda década del sieglu por parte de la Smdf fai que la empresa tenga en cuenta esti ferrocarril pa la salida del carbón, combinándolu siempre col de Llangréu que colocaba les sos producciones nel puertu de Xixón.
Un bon exemplu d’esti interesante procesu ye’l llavaderu nuevu de Carrocera, construyíu pola Duro p’atender la gran producción mineral qu’habría de salir del Pozu Sotón, que taba afondándose dende’l 1914. Esti llavaderu asitiábase na oriella derecha d’El Nalón, de mou que la Sociedad Metalúrxica Duro Felguera hebo de construyir dos pontes pa salvar el ríu. Ún, llevantáu nel sector oriental pa llevar el carbón al llavaderu, requirió la inversión de más de 45.000 pesetes ente’l 1913 y el 1914 por parte de la empresa, siendo destruyíu pol Conceyu nel 2001. Otra ponte, la que nos trata, construyóse na zona occidental pa que’l Ferrocarril del Norte entrara a cargar carbón hasta esti puntu, pudiendo la Duro unviar entós los sos minerales tanto per anchu internacional (Llangréu) como per vía normal española (Norte).
Nel 1915 el Conceyu de Samartín aprueba’l proyeutu d’empalme del ferrocarril del Norte col llavaderu de Carrocera per aciu de la construcción d’una ponte metálica –que será conocida como de Les Chapes énte la abondanza de roblonao– condicionando’l so vistu bonu a la fortificación ente la cepa del mesmo y la entrada al calce de los molinos de L’Entregu. Nel 1919 la Duro llamentaba que “siendo esta obra tan necesaria pa la salida de los menudos secos pel ferrocarril del Norte”, nun pudiera ser finalizada por mor d’una llarga fuelga de 8 meses.
La ponte, terminada nel 1920 y felizmente conservada güei gracies a la so reutilización como accesu peatonal al centru comercial asitiáu na finca del vieyu llavaderu, ye una estructura metálica descubierta na que los perfiles de fierro son roblonaos formando naspes nos llaos, dando un aspeutu y imaxe de solidez y perpetuidá.
PHOTO GALLERY
Recent Comments