Llocomotora SIA 3

Teníen trés exes acoplaes, con cilindros esteriores y tanque d’agua d’albarda sobre la caldera. Como yera habitual nes máquines americanes, contaba cola consabida campana, asitiada nel llau izquierdu de la caxa de fumos. Otros detalles interesantes yeren el gran farol p’allumar la vía en hores de poca lluz y un apartavaques delanteru de chapla. Col pasu de los años, diríen perdiendo toos estos accesorios.

Inicialmente taben al cargu de los trenes de carbón en bruto que baxaben dende los cargaderos de Santana o Los Pontones hasta’l llavaderu de L’Oyanco, asina como los de mineral llavao que diben a Santuyano. A partir de los años 30 la rede tranviaria de la SIA foi progresivamente recortada cola llegada del Vasco Asturiano a Coḷḷanzo y los sos servicios quedaron restrinxíos a los ramales mineros.

Les máquines de la serie desapaecieron poco a poco a midida que les llinies mineres se clausuraron a lo llargo de la década del 1960 y el so serviciu últimu tuvo llugar nel 1971, yá en manes d’HUNOSA. La númberu 3 foi la última sobreviviente del grupu y quedó abandonada nes instalaciones de Tartiere en L’Oyanco hasta l’esmantelamientu d’estes, cuando HUNOSA la treslladó como monumentu al llavaderu de Sovilla.

Cola clausura d’esti últimu regresó a tierres ayeranes como monumentu al Pozu San Jorge. Depués d’una primer restauración cosmética, nel 2014 foi oxetu d’una interesante iniciativa fecha pol personal de la empresa minera. Restauróse acordies al so aspeutu orixinal, conocíu al traviés d’una semeya de fábrica. D’esi mou, pintóse en prieto con fileteado en blanco y el nome de la propietaria escritu sobre’l tanque. Constitúi asina una amuesa singular de la teunoloxía norteamericana, mui frecuente n’esplotaciones asturianes por mor de la coxuntura de la Primer Guerra Mundial

Guillermo Bas Ordóñez