Nel antiguu casinu obreru ta allugáu güei el Centru d'Interpretación, onde'l visitante pue conocer la hestoria d'esti peculiar conxuntu mineru: la formación del yacimientu, los primeros intentos d'esplotación que se remonten al sieglu XVI, la llegada de los belgas en 1833, la fundación de la Real Compañía Asturiana de Minas, el desendolcu de los trabayos na mina hasta'l so zarru en 1915, l'ampliación de la so actividá a la metalurxa del cinc y del plomu, y l'impactu de toa esa actividá nel paisaxe y na vida de los habitantes de la zona.
L'elementu patrimonial de mayor interés, el so peculiar castillete de madera y cinc de 1856, foi declaráu Bien d'Interés Cultural en marzu de 2011. Caltiense la xaula orixinal que dexa al visitante baxar a 20 metros de fondura y caminar poles galeríes revistíes de lladriyu. Nesti percorríu amuésense les condiciones nes que los trabayadores d'esta mina realizaben la so xera cola amenaza constante del mar, el protagonista del espectacular final de la vista.
Nel esterior del muséu ta espuesta la llocomotora Eleonore (1880), la primera de les adquiríes pola Real Compañía Asturiana de Minas pa la so rede de ferrocarriles. Restaurada nel añu 2010, caltien munchos de los sos elementos orixinales.
El muséu tamién ufierta percorríos pola llocalidá d’Arnáu nos qu’el visitante pue conocer el conxuntu patrimonial orixináu en resultancia de tantos años d'actividá de la compañía: viviendes obreres, el chalé de direición o dellos equipamientos, como l'economatu o les escueles de l'Ave María. Estes últimes instalaciones son un interesante exemplu de promoción escolar sofitáu y manteníu pola Real Compañía Asturiana de Minas, n'usu dende la so inauguración en 1913 hasta'l so zarru en 1990.
Mónica García Cuetos
Comentaris recents