Bocamina La Nalona

Una bocamina ye la boca al esterior de la galería que sirve d’entrada y salida a una mina, de manera habitual al traviés d’un túnel horizontal, pero tamién per un pozu-planu. Cuando esta entrada conforma’l nivel basal d’una esplotación de monte compuesta de dellos pisos en lladera, pue denominase socavón. Esta entrada presenta cuasi siempre un llau de debilidá énte los argayos, de mou que les esplotaciones mineres de cierta entidá solíen reforciar estes entraes con una portada con materiales que dirán evolucionando col tiempo dende les llábanes irregulares hasta’l sillar, el lladriyu o la piedra artificial. Dende mui pronto les grandes empreses vieron nes bocamines una forma de dexar la so buelga y estilu.

El sector de La Nalona, trabayáu d’antiguo, conociera un apoxéu mineru na década del 1830 y 1840, pasando llueu a la Sociedad Metalúrgica Duro Felguera (SMDF). Ye más, hasta’l gran xiru hacia la minería qu’esperimentará la Duro a partir de la so constitución como Sociedá Anónima y que se traducirá na incorporación socesiva de los cotos de Herrero Hermanos (1902), Unión Hullera (1906) y Felgueroso Hermanos (1919), la empresa creada por Pedro Duro sólo tendrá dos focos d’esplotación: Etelvinas, en La Güeria Carrocera, y La Nalona, en Llangréu. En manes de la Duro, La Nalona crez, vuélvese más moderna y complexa y asciende pela lladera abriendo pisos nuevos, frentes nuevos, planos inclinaos y caminos de fierro. Na segunda década del sieglu, La Nalona entama a amosar signos d’agotamientu, de mou que’l xacimientu empezará a ser beneficiáu baxo’l nivel del valle con un pozu vertical: El Fondón.

La imaxe qu’anguaño vemos de la bocamina nada tien que ver cola orixinal o, siquier, la que presentaba dende’l pieslle de la mina de monte enantes de la década del 1930. Sigue presentando’l so carauterísticu arcu peraltáu, de lluz escaso como yera lo habitual nestos pisos d’antigüedá notable, pero’l restu esborriólo una Escuela Taller a últimos del sieglu pasáu. N’efeutu, l’arcu de lladriyu, namái interrumpíu pola clave de piedra, el muru de mampostería y el remate de sillería, dieron pasu a un escenariu artificial de falsa piedra de revoque que sería comeniente eliminar.

Faustino Suárez Antuña