Minería
La bocamina o socavón ye la entrada a la mina de monte. Les empreses solíen reforciar estes entraes y rescamplar de manera especial dalguna d’elles, desendolcando formes distintes, materiales, arcos y remates. La bocamina del Prau Molín presenta unes dimensiones grandes, rellacionaes col llabor intensu y productivu que cumplió a lo llargo del sieglu XX, siendo un modelu canónicu del tratamientu formal d’estos elementos por parte de la Duro.
Una bocamina ye la boca al esterior de la galería que sirve d’entrada y salida a una mina, de forma habitual al traviés d’un túnel horizontal, pero tambén per aciu un pozu- planu. Cuando esta entrada conforma’l nivel basal d’una esplotación de monte compuesta de dellos pisos en lladera, pue nomase socavón. Esta entrada presenta cuasi siempre un llau de debilidá énte los argayos, de mou que les esplotaciones mineres de cierta entidá solíen reforciar estes entraes con una portada con materiales que dirán evolucionando col tiempu dende les llábanes irregulares hasta’l sillar, el lladriyu o la piedra artificial. Dende bien pronto les empreses grandes vieron nes bocamines una forma de dexar la so buelga y estilu.
Los cotos hulleros del valle de Santa Bárbola, en Samartín del Rei Aurelio, conocen el so gran desarrollu de la mano de la Sociedad Metalúrgica Duro Felguera, que dirá adquiriendo numberoses propiedaes mineres per aciu les fusiones y integraciones qu’esperimenta nes dos décades primeres del sieglu XX y que la convertirán nuna gran empresa minera nacional. La Duro potenciará nesti valle llavaderos, ramales ferroviarios propios y ún del Ferrocarril de Langreo, un pozu vertical…
Construyida nel 1923 pola Duro pa centralizar la esplotación minera de monte y, dende ehí, llevar el carbón pel ramal ferroviariu propiu hacia’l llavaderu, la bocamina del Prau Molín tien una gran seición de galería resuelta al esterior per aciu un arcu escarzanu de sillería de piedra, material que se caltién na parte inferior, mientres que la bóveda fíxose con lladriyu. Na clave de la bocamina amuésense la fecha y les iniciales de la empresa, asina como’l símbolu de la minería y de la rama minera de la Duro. Cola entrada en funcionamientu del Pozu Cerezal, la bocamina pasó a cumplir una función similar a la del Socavón Emilia en La Nueva, enllazando cola primer planta del pozu y, asina, daba salida al carbón pal llavaderu. Anguaño sirve de desagüe al pozu, siendo, amás, un símbolu de la población, que cubrió la entrada de monumentos y maquinaria y, amás, fai una ufrienda relixosa na festividá de Santa Bárbola, patrona de la minería.
GALERÍA D'IMAXES
Comentaris recents