Bocamines d’El Sotón

Dende’l 1848 delles sociedaes trabayaron estos cotos d’El Sotón, como la Sociedad Minero Cántabra de Santa Ana, a la que socederíen Hulleras de Santa Ana y, llueu, Carbones de Santa Ana, que supón la entrada parcial de la familia Herrero nel negociu, de la mano de Gaspar Martínez, ún de los más escaecíos pero decisivos empresarios mineros de la segunda metá del sieglu XIX. Será a lo último de la década del 1870 cuando la banca Herrero se faiga col control de la sociedá, modernizando les esplotaciones, estendiendo los ramales ferroviarios y incorporando’l vapor a la tracción. Nel 1902 la Sociedad Metalúrgica Duro Felguera (SMDF) absorberá toos estos cotos, que sumaos a los de la Unión Hullera nel 1906 y los de Felgueroso Hermanos na década siguiente, convertirán a la Duro na principal firma hullera del país. En manes de la SMDF l’área d’El Sotón siguirá creciendo, desarrollándose’l gran pozu de la sociedá, el Sotón, qu’acabaría por sustituyir a les mines de monte a partir del 1926.

Les bocamines d’El Sotón, accesibles dende la carretera d’Uviéu, son les herederes d’este complexu procesu empresarial, pero tamién valiosos exemplos de la evolución nel tratamientu de les vieyes entraes a les mines de monte. Les conocíes como Sotón Antiguo correspuenden a los primeros momentos de la esplotación y presenten cencielles llábanes irregulares de piedra, que contrasten cola Bocamina Nueva, una de les primeres en ser singularizada pola Duro, nel 1907, yá con sillar nes doveles. Les de Sallosas y Generala deben el so aspeutu actual a rehabilitaciones del 1934 y 1940, necesaries pa servir al pozu Sotón, la primera como pozu de tierra y la segunda pa la ventilación y como entrada de les mules pel so pozu planu. Son éstes dos les qu’amuesen l’estilu definitivo de la Duro nel tratamientu de les sos bocamines, con una gran clave y murios de mampostería.

Faustino Suárez Antuña