Círculu d’Obreros

El Círculo de Obreros de Trubia, primer denominación que tuvo’l que güei conocemos como Casinu Obreru, ye ún de los emblemas del barriu de Ḥunigru. Construyóse a pidimientu de Luis Hernando Espinosa, direutor de la Fábrica d’Armas, que firma’l planu del edificiu’l 3 d’abril del 1918; el día 15 d’esi mesmu mes el Conceyu d’Uviéu abre l’espediente d’obra. La primer parte que s’inauguró foi’l salón de llectura y la sala de recreu, llugar de charra y descansu pal personal de la fábrica d’armes que contaba con chigre y meses de xuegu; col tiempu añadiríense la biblioteca, con cerca de 10.000 volúmenes, o’l salón de billar. 

Ún de los espacios fundamentales d’esti edificiu ye’l teatru, inauguráu como tal n’ochobre del 1918 con una representación teatral de la compañía Hermanos Enguídanos, grupu itinerante de gran sonadía. Muestra de la so modernidá y de la influencia qu’exercía la fábrica d’armes ye’l fechu de que nos primeros años de la década del 1920 s’instalaría una cámara de cine. Dende esi momentu’l teatru vio pasar pel so escenariu infinidá de representaciones teatrales, películes, conferencies o aconceyamientos.

Les décades del 1940 y 1950 foron les de mayor esplendor d’esti espaciu, con más d’un millar de socios, estrenos cinematográficos y teatrales o grandes bailles. Foi’l centru social y cultural de Trubia hasta que principió la so decadencia na década de los 70, época na que pasa a nomase Centro Cultural de la Fábrica Nacional de Trubia. Tres el so pieslle, nel 1996 adquiriólu’l Conceyu d’Uviéu, convirtiéndolu en Centru Social. Una nueva reforma nel 2008 dio-y la so fisonomía actual, respetando la estructura llonxitudinal y los sos trés cuerpos separtaos por dos torres, y recuperando’l balcón del proyeutu orixinal.

Manuel Antonio Huerta Nuño