Escuela Artes y Oficios

A lo último del sieglu XIX estes escueles treslládense a un espaciu más urbanu, dientro del nucleu de La Felguera, que, como’l de Sama, principiaba a crecer ordenaes pol Planu de Población del 1896 y al calor d’una industria con puxu. El so allugamientu nuevu ganaría en centralidá y dignidá col nacimientu d’una pieza urbana nueva, el Parque Dolores Fernández Duro, creáu por ampliación d’una zona axardinada más limitada frente a la ilesia. El parque quedaba llendáu entós pol templu cola estatua de Pedro Duro delantre, el teatru y les escueles nueves.

L’equipamientu escolar organizábase en dos cuerpos paralelos, ún pa neños, de tamañu mayor, y otru pa neñes, entrambos nuna sola altura. La de neños compartía espacios dende’l 1917 cola Escuela d’Artes y Oficios, lo que motivó la so ampliación nel 1924. Les obres, según proyeutu del arquiteutu municipal Ramón de Valle Lecue, consistieron nun recrecíu n’altura per aciu de la inclusión d’una planta más. No que se refier a l’articulación interna del edificiu rescampla’l so estragal circular con escalera de doble tramu dende’l que s’accedía a les aules y talleres. Dende esti puntu llegábase al restu de dependencies, dedicaes a aules y talleres nun primer momentu. 

Les escueles punxéronse nel 1902 en manes de los Hermanos de la Doctrina Cristiana –  conocío como La Salle– nun bon exemplu de l’apuesta pola enseñanza confesional que distinguió a la Duro, y que non pocos conflictos traería colos obreros nel valle d’El Nalón dende’l 1906. La llegada de la República significó un fomentu de la enseñanza pública y laica, naciendo una nueva Escuela de Trabayu nun edificiu nuevu na cai Conde Sizzo. Les de La Salle siguiríen funcionando hasta la década del 1970, cuando la Llei Xeneral d’Educación y la propia degradación del inmueble impusieron el so treslláu al barriu de La Reguera.

Faustino Suárez Antuña