La fábrica de la SMDF en La Felguera yera’l centru sobre’l que xiraba’l mayor proyeutu industrial que tuviera Asturies, que taba compuestu de la planta siderometalúrxica, de la mayor agrupación de mines de carbón hasta la nacionalización del subsector hulleru y tolos talleres, sierres y parques de carbones asociaos, de mines de fierro nel Altu Nalón, en Gozón y en Santander, d’una fábrica de lladriyos refractarios, de cementu, de termolletricidá…
Llevantada a partir del 1857 pol industrial Pedro Duro Benito como Duro y Compañía y reconvertida en Sociedad Metalúrgica Duro Felguera nel 1900 pa salir a bolsa nel 1902, la Duro, como siempre se conoció, sería la principal productora de fierros na década del 1880, acusando llueu’l cambio al aceru y convirtiéndose nos años venti na principal firma hullera del país, a la par que diversificaba’l so negociu sobre una base siempre entamadora y industrial.
Nel centru de too taba la fábrica de La Felguera, un xigante de guapos edificios de lladriyu que conteníen la fuercia d’un corazón d’aceru afumador, onde llegaben les materies primes y d’onde partíen productos finales, controlando y equilibrando’l sistema. Pero, amás, la Duro, con instalaciones industriales y residenciales a lo llargo de tol cursu mediu del ríu Nalón, foi integrando estremaos ramales ferroviarios nún propiu que recoyía les producciones, tresportaba de too y suministraba insumos, vertebrando, asina, un llugar onde’l nexu nexu común yera’l gran proyeutu industrial.
La planta llangreana ye la única de les dos plantes siderúrxiques interiores (xunto con Fábrica de Mieres) y de les trés históriques (sumando a éstes la de Moreda-Gijón) que caltién dalgo del so patrimoniu edificáu en pie. N’efeutu, magar los valtos intensos que la vaciaron mediada la década del 1980, una amplia pantalla perimetral d’edificios, asina como dellos refrixerantes y una chimenea, salváronse de la piqueta, pa dar pasu a un conceutu nuevu de Secundariu, la Ciudad Industrial de Valnalón, una triba intermedia ente’l polígonu industrial tradicional y un parque teunolóxicu na que la cuenca sigue calteniendo, non ensin razón, confianza y fe.
Faustino Suárez Antuña
Comentaris recents