Fornos Altos – UNINSA

Concluyida la construcción del primer fornu altu en xineru del 1971, el 6 de mayu, a les 19.20 hores, procedíase al prendíu, obteniéndose la primer colada cinco xornaes más tarde. Pieza clave del engranaxe siderúrxicu, el funcionamientu del fornu y de les sos instalaciones complementaries lleva arreyáu un pensáu sistema de preparación de materies primes, abastecimientu enerxéticu, carga, tresporte y refrixeración. 

Nel fornu altu obtiénse arrabiu a partir del calentamientu d’un amiestu formáu por mineral de fierro, coque, sínter –finu de mineral de fierro y caliar– y otros fundentes. La carga introduzse pela parte superior del fornu, mientres que na zona inferior los tubos de conducción soplen dientro l’aire necesario pa la combustión. El coque, qu’actúa como axente reductor, ye fabricáu a partir d’un complexu procesu de destilación de la hulla fechu nes bateríes. Les de la factoría de Xixón nun s’instalaron hasta los años 1974 y 1977, abasteciéndose inicialmente de les que veníen funcionando nes históriques plantes de La Felguera, Mieres y Moreda-Xixón. Los gases derivaos del procesu siderúrxicu, una vegada depuraos, almacénense en gasómetros, emplegándose en parte nel calentamientu de les estufes del fornu.

L’arrabiu algamáu, con una riqueza en fierro elevada –al rodiu del 95 %–  y un 3,5 % de carbonu, sepártase de la escoria nel crisol asitiáu nel fondu del fornu. Estrayíu per aciu colaes y depositáu sobre cuyares o cuyares-torpedos, la tresformación del arrabiu n’aceru faise nos convertidores de l’acería, eliminando’l so escesu de carbonu con un sopláu d’oxíxenu. Na colada continua solidifícase, obteniendo allisaos de diferentes tipos que, siguiendo’l procesu de llaminación, permiten algamar los productos tresformaos y finales (planos, perfiles, alambrón, carriles y redondos).

Natalia Tielve García