Ente elles tenemos trés que tán güei como monumentu en dellos puntos del conceyu de Mieres. La primera ye la númberu 8, una máquina de trés exes acoplaes construyida nel 1918 pola empresa norteamericana Vulcan Iron Works xunto con una hermana ximielga yá desapaecida. Yera una representante típica del diseñu industrial d’Estaos Xuníos d’América, incluyida la consabida campana p’avisar del pasu. Tuvo a cargu del remolque de trenes na llinia minera del valle d’El Ayer hasta la so retirada cola llegada de les llocomotores diésel, hacia’l 1970.
Espuesta primero como monumentu nos talleres de Sovilla, llueu de la so clausura restauróse cosméticamente y treslladóse a les cercaníes del Pozu San José, en Turón, un llugar poco afayadiza pa ella, yá que nunca trabayó nesi valle.
El segundu exemplar ye la númberu 9, otra máquina d’orixe yanqui construyida al empar que la 8 pero por otro fabricante distintu, l’American Locomotive Company en su factoría Cooke de Paterson, Nueva Jersey. Anque de carauterístiques asemeyaes a la so predecesora, tien un diseñu diferente, con bastidor esterior y distribución interior.
La so historia ye tamién mui asemeyada: destinada a los trenes de carbón en bruto que se dirixíen al llavaderu de Sovilla hasta la so retirada, cuando quedó como monumentu nesi llugar. Tres la clausura d’eses instalaciones, caltúvose en manes d’HUNOSA, que la restauró y la treslladó a los xardinos del Pozu Santiago.
Por último, tenemos a la númberu 11, un exemplar d’orixe bien diferente. Fabricóla nel 1902 la firma británica Kerr Stuart pa la empresa onubense Minas de San Miguel, onde llevó’l nome ESCALADA. Cuando esta quebró, la máquina pasó a manes d’un negociu de maquinaria que la revendió, tres la Guerra civil, a la Sociedad Hullera Española.
Yá n’Asturies sufrió una importante reforma qu’alterió bastante’l so aspeutu orixinal. Al igual que les máquines anteriores, tuvo en serviciu hasta la llegada de la tracción diésel y posteriormente HUNOSA colocóla como monumentu nos talleres de Sovilla. Finalmente cedióse al Conceyu de Mieres, rehabilitada y colocada a mou d’adornu xunto a la vieya estación del Vasco Asturiano de la población.
Guillermo Bas Ordóñez
Comentaris recents