Mina El Toral

Minería

Mina El Toral

Feleches, Siero

Minería
Mines de Monte

Orixinarios de la parroquia llangreana de Ciañu, los hermanos Víctor, Constantino y Secundino Felgueroso, activos empresarios mineros, acumulen nes décades primeres del sieglu XX un bon númberu d’esplotaciones mineres repartíes pelos conceyos de Llangréu, Siero y Llaviana, a les qu’añadirán otres más nes cercaníes de Xixón. La sociedá Felgueroso Hermanos constituyérase nel añu 1893 cola participación de les sos hermanes y el padre de toos ellos.

A la Unión Hullera y Metalúrgica de Asturias adquieren-y los Felgueroso les mines d’Aramil, nel valle d’El Río Nora. Una de les mines más importantes d’esti grupu yera El Toral, asitiada na parroquia de Feleches en Siero. Contó con un pozu planu, llavaderu de carbón y edificios auxiliares como llampistería y cases de baños.

Nel 1920, cola vista puesta nel so proyeutu d’afondamientu en Xixón, los Felgueroso venden a la Sociedad Metalúrgica Duro Felguera los sos cotos hulleros entamaos nos grupos Aramil, Saús y La Moral en Siero; Ciaño y Barros, en Llangréu; y Barredos, en Llaviana.

Mónica García Cuetos

 

GALERÍA D'IMAXES