L’antigua, y cuasi escaecida, parroquia de San Llorienzo de Cortina, en Llaranes, nun foi una esceición. Bien aína, y de manera cuasi simultánea a la construcción de la factoría, llevantaríase nesta zona del valle del ríu Arlós un pobláu obreru que, de manera proporcional a la so empresa promotora, acabaría por convertise nel buque insinia del paternalismu estatal franquista, desendolcáu al traviés del Instituto Nacional de Industria.
Los arquiteutos Juan Manuel Cárdenas y Francisco Goicoechea diseñaron un conxuntu residencial autosuficiente formáu por más de mil viviendes habitaes por obreros, capataces y otros profesionales de la factoría, a esceición de los inxenieros, que residíen na ciudá d’Avilés. Toles construcciones llevantáronse condicionaes por una arteria principal de comunicación y por una llomba natural.
La exa central del pobláu ta ocupada polos edificios d’usu coleutivu. La ilesia de Santa Bárbara, construyida sobre la citada elevación, domina visualmente’l conxuntu. Frente a ella, la Plaza Mayor dio agospiu a los comercios de Llaranes y foi sede de les principales celebraciones instauraes d’alcuerdu colos plantegamientos paternalistes. Estos dos inmuebles son los más visibles y, al empar, los más conservadores, siguiendo nel so diseñu los parámetros de l’arquiteutura autárquica de posguerra.
Los proyeutos más innovadores, venceyaos a l’arquiteutura del Movimientu Modernu, reserváronse pa llugares secundarios con protagonismu menor. Sobresalen les escueles femenina y masculina, l’economatu y, xunto a la zona deportiva, el Centru Sindical y la bolera de cuatriada, estos dos últimos obra de los hermanos Somolinos Cuesta.
Rubén Domínguez Rodríguez
Comentaris recents