Minería
La familia Nespral apaez arreyada a la esplotación de la hulla lo menos dende metanes el sieglu XIX, cuando Vicente Fernández Nespral rexistra delles denuncies mineres na parroquia de San Andrés de Llinares, en Samartín del Rei Aurelio. Sicasí, habrá qu’esperar hasta lo último del sieglu pa que naza una empresa, Nespral y Compañía, pal trabayu del carbón en concesiones como Entregu o Sorriego, que nesos años pasaben a tener bones comunicaciones gracies al Ferrocarril de Langreo y el del Norte.
La marcha de la compañía esperimentará un cambiu decisivu cola entrada na familia de Joaquín Velasco, casáu nel 1905 con una fía de los propietarios. Inxenieru de Mines vallisoletanu, entama como contratista mineru afondando Pumarabule y tomando n’arriendu llueu les minas de Coto Musel y La Sota, en Llaviana. Amás, Joaquín Velasco será representante del Estáu na Asamblea Nacional Consultiva primorriverista ente’l 1927 y 1930, y un innovador empresariu pecuariu al traviés d’una moderna finca nel Duero. Será baxo la so iniciativa cuando s’afonde’l Pozu Sorriego nel 1916, llueu de negociar una permuta de concesiones cola SMDF (Sociedá Metalúrxica Duro Felguera) pal beneficiu de les capes en fondura.
Nel 1918 el Pozu Sorriego tenía una fondura de 135 metros –sería llueu reafondáu hasta los 210 m– y una seición de 4,25 m, tando servíu por una máquina d’estraición de 24 cv y un compresor de 16 cv. Una maquinaria, qu’al igual que’l castillete y les instalaciones, yera de notable precariedá a la espera de la so sustitución definitiva. Será na década del 1920 cuando se configure l’espaciu de producción definitivu, contando con un réter y cargaderos al Ferrocarril de Langreo, montándose un castillete metálicu de celosía roblonao –sustituyíu n’época d’HUNOSA– sirvíu por una máquina d’estraición Siemens. Pero si dalgo define’l Pozu Sorriego ye la so casa de máquines, un edificiu singular con una fachada principal que presenta un remate escalonáu coronáu con un frontón curvu.
Nel 1969 Nespral y Compañía intégrase n’HUNOSA, que caltién Sorriego como auxiliar hasta’l so pieslle definitivu nel 1978.
GALERÍA D'IMAXES
Comentaris recents