Los cotos de la Unión Hullera concentrábense nel valle del ríu Candín, ún de los espacios asturianos más íntimamente venceyaos a la industrialización d’Asturies. D’equí proceden los informes de Xovellanos y de Carreño y Cañedo sobre les primeres mines, documéntense los ferrocarriles de tracción animal más tempranos, y, non por casualidá, per estos valles atraviesa la Carretera Carbonera y el Ferrocarril de Langreo, nacen grandes pozos mineros y, nel so pieslle, llevantóse la gran planta siderúrxica de la Duro. Asina, nun sorprende’l fechu de que les concesiones mineres de la zona pasaran de forma socesiva peles manes d’empreses y personaxes cuasi llexendarios nel contestu industrializador asturianu: Alejandro Aguado, la Gran Duquesa de Leuchtemberg de la familia imperial rusa o la sociedá D’Eichtal y Compañía.
La SMDF caltuvo les mines de monte hasta’l 1926, cuando afondó’l so primer pozu vertical nel área, el Mosquitera, dotáu d’un conxuntu de casa de máquines-castillete de calidá estética esceicional. Too esto sedría sapozao nel 1972 baxo una escombrera, montándose una gran torre d’estraición de formigón de más de 50 metros d’altor.
Nun llugar cercanu, Tiuya, la empresa afondara nel 1950 el so segundu pozu nel área: el Mosquitera II o Terrerón, que contaría con una colonia penitenciaria pa presos políticos. Equí la Duro tornó al modelu de les mines de Modesta y del Pozu Fondón: lladriyu visto, recercaos de piedra artificial… El castillete d’El Terrerón foi’l segundu que la Duro construyó cola téunica nueva de la soldadura, probando posibilidades nueves que nun tuvieron munchu desarrollu, como les tornapuntes de celosía tubular y ensin enriostamientu ente los zancones, lo que-yos da’l carauterísticu aspeutu d’un compás o trípode y que tenía como finalidá l’allixeramientu de la estructura.
N'avientu de 1989, declaróse una quema na planta séptima n'amburando una de les cintes tresportadores. El fueu algamó una capa de carbón de seis metros aniciando temperatures de más de 2.000 ºC nel interior de la mina. Morrieron cuatro mineros, hubo numberosos mancaos y causó el cese d'actividá del pozu.
Faustino Suárez Antuña
Comentaris recents