Otres Mines

Contabilizáronse n’Asturies más del millar de nicios y xacimientos tanto de sustancies metáliques (antimoniu, arsénicu, cobaltu, cobre, fierro, manganesu, mercuriu, molibdenu, níquel, oru, plata, plomu, wolframiu y cinc), como non metáliques (acebache, barita, caolín, fluorita, magnesita y yelsu). Güei namái tán n’usu dos esplotaciones d’oru, mentanto qu’en periodos precedentes les mines metáliques n’activo superaron, por términu mediu, la ventena. L’aprovechamientu de los minerales non metálicos ufrió tamién un interés bultable, que namái se caltién pa la fluorita.

Tiense constancia de qu’al rodiu del 2.000 a.C. yá s’aprovechaben minerales de cobre, como lo atestigüen diferentes vestixos de llaboréu en mines non mui alloñaes d’Uviéu (Aramo y Rospaso) y de Cangues d’Onís (Milagro). De dómina romana son les grandes escavaciones (“cortes”) feches pa sacar l’oru nel occidente asturianu, al igual que los nicios d’aprovechamientu de ments de cobre, fierro mercuriu y plomu. L’ocasu d’esta minería debió coincidir col abandonu de los castros de la zona occidental, pa contra finales del sieglu II o entamos del sieglu III.

Tres un ampliu periodu históricu nel que les reseñes sobre’l tratamientu de sustancies minerales tán ausentes, despega’l sector a finales del sieglu XVIII y sobre manera cola promulgación de la Llei Minera de 1825 y col nomamientu, en 1833, de Guillermo Schulz como Inspeutor del Distritu Mineru d’Asturies.

La notable actividá estractiva pa les sustancies metáliques siguió a lo llargo del sieglu XX hasta la década de los años 70, en qu’empecipió a decayer el so interés, coincidiendo col fortalecimientu de la recuperación de les non metáliques –como’l caolín y la fluorita– y, sobre manera, de les peñes destinaes a usos industriales: caliar, barru, sable, arenisca, cuarcita, dolomía, pizarra, síliz, etc.