Otros edificios y equipamientos venceyaos a la minería de la hulla

Víctor Considérant dicía que l’arquiteutura escribe la historia, poro, namás fadría falta reparar los restos patrimoniales de les esplotaciones mineres pa retrotrayenos a dómines pasaes rellacionaes col sector. Nesti sen, son innumberables los inmuebles derivaos de la historia industrial nos que s’axuntaron diseñu, téuniques y soluciones arquiteutóniques singulares y que constitúin un patrimoniu industrial esponente de la nuesa memoria coleutiva. Sicasí, hai que matizar que l’actividá minera non solo pobló d’espacios productivos la nuesa redolada, sinón que tamién traxo otru tipu de construcciones de tipu social o equipamientos fuera del ámbitu puramente llaboral. Tratábase d’edificaciones que, en dellos casos, respondíen a midíes paternalistes enunciaes por hixenistes o filántropos y adoptaes por grandes empreses del sector como Duro Felguera o la Sociedá Hullera, col fin de reforciar venceyos de llealtá y meyorar el rendimientu del obreru.

Si la dotación de vivienda obrera foi una de les constantes dientro d’eses iniciatives d’empresa, la instrucción pedagóxica del obreru tamién ocupó un llugar principal col fin de reorientar la so vida dende neñu al traviés de la promoción d’escueles d’enseñanza primaria. D’otra naturaleza, anque dientro d’esti ambiente d’alfabetización, enmárquense instituciones benéfico-docentes como l’Orfanatu de Mineros Asturianos, promovíu por Manuel Llaneza al traviés del Sindicatu Mineru d’Asturies. Ensin escaecer la enseñanza de persones adultes n’escueles d’oficios o aquelles qu’instruyíen a futuros inxenieros o capataces sobre conocimientos científico-téunicos de la esplotación de mines. Nun podemos escaecer, amás, llugares pal ociu, la provisión d’alimentos o l’asistencia médica (grandes hospitales, como’l Sanatoriu Adaro). Como contrapuntu, tamién atopamos campañes constructives destinaes a inxenieros o mandatarios con un vocabulariu arquiteutónicu más curiáu.