La siderometalurxa n’Asturies

A lo cabero del sieglu XVIII la instalación de los fornos Volcán ya Incendio na Fábrica d’Armes de Trubia, a los que quixo alimentase per aciu de la producción del fornu de coquización montáu por Casado de Torres en Llangréu, foron el primer gran intentu d’instalación d’una siderurxa industrial y moderna n’Asturies. Hai qu’esperar, sicasí, a la creación de les grandes plantes de Pedro Duro en Llangréu y la de Numa Guilhou en Mieres na segunda metá del sieglu XIX pa que la industria del fierro conoza un surdimientu definitivu, tres les diverses iniciatives que, con mayor o menor éxitu, vinieron primero.

Magar que’l cambéu del fierro al aceru supunxo una cierta decadencia de les fábriques asturianes frente a les vizcaínes, estes foron a caltenese nel negociu diversificando la so actividá –escontra’l carbón como nel casu de la Duro– o especializándose en determinaes facetes –como, por casu, escontra la inxeniería en Fábrica de Mieres– que complementaron el so oxetivu prioritariu. La perda de valor del factor de llocalización impuestu pol carbón frente a les importaciones fixo qu’apaecieren plantes siderúrxiques costeres, como la de Moreda- Xixón, y tán na base de la creación per parte del INI d’ENSIDESA n’Avilés a lo cabero de la década de 1950, qu’acabaría integrando la obsoleta y descapitalizada siderurxa asturiana. Güei en manes d’Arcelor-Mittal, la planta avilesino-xixonesa ye la única siderurxa integral d’España.

Pero non tola industria metalúrxica asturiana tuvo centrada nel fierro y l’aceru. N’efeuto, la metalurxa del cinc desendolcada pola Real Compañía Asturiana de Mines n’Arnáu dende 1858 y entá n’activo en manes d’Asturiana de Zinc –o la del aluminiu, ENDASA– tamién del INI, ente Avilés y Gozón, suponen los finxos d’un procesu industrial d’enorme volume y trescendencia. La siderurxa y la metalurxa fixeron que’l carbón asturiano atopara’l so necesariu desendolcu y llugar, y el patrimoniu que nos dexaron tien un estraordinariu interés ya intensidá.