por Mónica García Cuetos
Doctora en Historia del Arte por la Universidad de Oviedo. Su actividad profesional se centra en el estudio del patrimonio cultural, en especial el industrial y el derivado de la obra pública y la ingeniería.
Cola llegada del ferrocarril surde n’Asturies una nueva clas trabayadora, los ferroviarios; un coleutivu que fai una gran variedá de xeres que dan como resultáu los distintos oficios ferroviarios.
Les compañíes de ferrocarril, obligaes pola reglamentación del sector, llevaron alantre una política de viviendes que respondía a les necesidaes de caúna de les categoríes profesionales. Un rasgu que comparten col restu de les viviendes obreres ye la xerarquización del espaciu. D’esta miente, cada grupu profesional solía tener una mena d’agospiamientu acordies cola importancia que la empresa daba al so desempeñu.
El mesmu procesu de construcción de les llinies ferroviaries exixó habilitar espacios pa vivienda. Les obres del ferrocarril de Payares movilizaron a cientos de trabayadores, agospiaos nunos casos en barracones de madera precarios onde malvivíen apiñaos o en poblaos fechos a pie d’obra como en Fierros o Campumanes.
Los edificios d’estación solíen llevar axuntes viviendes pal personal ascrito a elles. Un exemplu perbonu ye la estación de La Cobertoria, L.lena, incluyida dientro de les obres de lletrificación de la lllinia de Payares, como tamién lo foi l’edificiu destináu a taller y depósitu de llocomotores d’Uxo onde se dispunxeron espacios pa residencia.
El Ferrocarril de Llangréu promovió un bon númberu de viviendes pa los sos trabayadores que se reparten a lo llargo de tol percorríu de les llinies, incorporaes nes estaciones o n’edificios a tal fin, como los construyíos frente a les estaciones d’El Berrón en Siero y Sama en Llangréu.
Les barriaes de posguerra tamién incluyeron pabellones destinaos al personal de les compañíes de ferrocarril, como la de Fontoria, en Llaviana o La H.uécara en Llangréu. Otruo exemplu d’iniciativa pública y privada sedrá la construcción del grupu de dieciséis viviendes en Tremañes, Xixón, na que participaron el Ferrocarril de Llangréu y el Patronatu Llaboral Francisco Franco.
En noyos ferroviarios, como Soto Rei o Villabona, y en ciudaes como Uviéu y Xixón, onde’l tráficu de pasaxeros y mercancíes yera sobre manera intensu y riquíen una gran dotación de personal, consérvase un bon númberu de viviendes de les principales compañíes, ente ellas la Compañía del Norte o los Ferrocarriles Económicos d’Asturies.
AA.VV. Asturias y el ferrocarril, Museo del Ferrocarril de Asturias, 1999.
FELGUEROSO DURÁN, A.R., Viviendas del Ferrocarril de Langreo, Ayuntamiento de Langreo, 2007.
FLORES SUÁREZ, J.M., La Compañía del Ferrocarril de Langreo en Asturias. Estaciones e infraestructura (1846-1972), Ediciones Trea, 2004.
BAS ORDOÑEZ, G. (2018). “El ferrocarril de Pajares, un repaso a su historia y patrimonio” en Vindonnus. Revista de patrimonio cultural de Lena, 2018.
BAS ORDOÑEZ, G., “El enclave ferroviario de La Cobertoria”, en Vindonnus. Revista de patrimonio cultural de Lena, 2017.
Comentaris recents