Central de La Cuadriella

Patrocinada pola empresa Hulleras de Turón pa suministrar enerxía llétrico a  les instalaciones productives, sociales y residenciales, la central quemaba carbón nunos fornos anexos a la nave –güei desapaecíos– qu’alimentaben la turbina de la sala de máquines. Magar se rehabilitare, la central nun cuenta con usu nengún. 

L’inmueble principal, únicu conserváu, ye de planta rectangular y cuenta con un interior diáfanu carauterísticu d’esti tipu d’instalaciones industriales, qu’ampliaba l’espaciu de trabayu. Ta construyida en lladriyu macizo, cargao no más d’ello, y cúbrese con un techu a doble vertiente de teyes planes sosteníu nel interior por cerches metáliques. 

Los murios esteriores, cargaos, articúlense per aciu d’una socesión d’elementos y moldures de lladriyu visto que-y dan gran plasticidá. Los vanos asitiaos nos llaterales, que faciliten la entrada de lluz natural al espaciu de trabayu, son arcos de carpanel o rebaxaos de lladriyu, cola clave y l’arranque de los frontales o xambes resaltáu dimensional y cromáticamente. Ente los diferentes ventanales distribúyense faxes que percuerren l’edificiu dende’l suelu hasta la llinia d’imposta qu’arrodia, a mou de cornisa, tol edificiu. Esti elementu estiéndese hacia les fachaes llaterales, creando la sensación de frontón triangular coronáu por un óculu o güeyu. Na parte inferior atopamos vanos bíforos y tríforos, del mesmu mou qu’ente ellos tán les faxes que tamién enmarquen les esquinas del inmueble.

Na so parte posterior llevántase, separtada pola carretera, una chimenea de lladriyu de venticinco metros d’altor diseñada por Manuel Martínez. Asítiase sobre un macizu cuadrangular y el so remate, parcialmente perdíu, cuenta con una cenefa compuesta por falsos arcos y una cimera de filaes concéntriques de lladriyu.

Rubén Domínguez Rodríguez