La entrada en funcionamientu de la Real Fábrica de Municiones Gruesas de Hierro Colado vencéyase al dictame que l’inxenieru militar Fernando Casado de Torres emite, el 5 de setiembre del 1792, aconseyando como llugar más afayadizu pal establecimientu d’una fábrica armera nueva’l puntu de xuntura de los ríos Trubia y Nalón. Nel 1794 entamaben, baxo la direición del coronel d’artillería Francisco Vallejo, les obres d’infraestructura y acondicionamientu, comprendiendo talleres, almacenes, viviendes y equipamientos sociales. Ente los años 1795 y 1796 construyéronse dos fornos de fundición, ‘Volcán’ y ‘Incendio’.
La modernización, puxanza y prestixu de la Fábrica de Trubia –tres los años d’inactividá motivaos pola invasión francesa nel 1808– danse a partir del 1844 cola llegada del xeneral d’artillería Francisco Antonio de Elorza y Aguirre. Baxo la direición d’Elorza entámase la reforma integral de les instalaciones y la fábrica resurde práuticamente como un establecimientu de planta nueva: vese dotada de medios nuevos, ameyórase l’abastecimientu de materies primes y el sistema de comunicaciones, introduzse la mecanización y la racionalización del procesu productivu, constrúinse dos fornos altos, ‘Daoíz’ y ‘Velarde’, y créase la primer Escuela de Formación Profesional Obrera del país.
Nel mandatu d’Elorza caltúvose’l modelu mestu de fábrica y pobláu, construyéndose, xunto a los edificios fabriles, el palaciu pa la direición, pabellones d’oficiales, cuarteles pa operarios, chigre, places y paseos arbolaos. Entamó amás la obra del pobláu de Ḥunigru, dada la escasez de suelu nel interior del recintu fabril, p’agospiar a los obreros, llocalizaos na marxe derecha d’El Ríu Trubia y comunicáu cola fábrica per una ponte. Al pobláu siguieron-y otres promociones residenciales, como Coronel Esteban, Coronel Baeza, Santa Bárbara y Cataluña.
Natalia Tielve García
Comentaris recents