Naves de Llaminación

Carlos Fernández Casado, l’inxenieru encargáu de llevar a bon fin los trabayos, diseñó una de les estructures más imponentes de tol conxuntu fabril, compuesta por siete naves apegaes que llegaron a algamar los novecientos metros de llonxitú y que cubríen una superficie de trabayu total de 138.800 metros cuadraos. La colosal estructura llevantóse emplegando, sacante nos pilares, elementos prefabricaos de formigón que favorecieron el cumplimientu del plazu previstu pa la conclusión de les obres: trés años. Na so cimentación utilizáronse una cantidá de campanes y pilares «que supera […] a la suma de los usaos en tol restu de la obra». Caúna de les naves cuenta con una lluz d’ente venti y trenta metros, y una altura que llegaba a alcanzar los catorce. Una de les innovaciones principales desendolcaes nesti edificiu séptuple foi l’aplicación de les vigues K, de formigón pretensao, que permitieron salvar les dificultaes constructives propiciaes poles dimensiones del inmueble y la escasez d’elementos metálicos.

A estes instalaciones, llevantaes por Huarte y Compañía S.A., llegaben los lingotes recalentaos dende l’apegada nave de Fornos de Fuexa. N’algamando la temperatura óptimo, éstos introducíense nos trenes de llaminación. El Tren Esbastiador, el Tren Estructural, el Tren de Chapa Grueso y el Tren Steckel permitíen facer dellos perfiles, carriles, bobines y chapa naval.

La nave sur, asitiada de forma paralela al ríu, cuenta a los sos pies con un mural musivariu de factura asemeyada a los qu’atopamos na nave de Fornos de Fuexa. Nesta ocasión, el so calter figurativu remítenos a los distintos modelos de perfiles.

Anguaño, tres el cese del so usu orixinal, los sos espacios diáfanos y versátiles sirven d’almacén de productos terminaos y preparación de chapa grueso pa la multinacional ArcelorMittal. 

Rubén Domínguez Rodríguez