Pobláu de Vega

Fórmenlu trés viviendes dobles, nunos terrenos mui próximos a la vía y cerca d’ún de los centros de tráficu de la llinia, la factoría de Duro Felguera. El modelu usáu tomóse d’un catálogu, yá que se da la circunstancia de que’l mesmu tipu lu emplegaron otres empreses de la rexón como Hulleras del Turón o Hulleras de Veguín y Olloniego neses mesmes feches.

Cada vivienda tien planta baxa y un primer pisu de techu inclináu, illumináu per aciu d’un casetón na fachada principal y una ventana nel hastial. La planta baxa tien trés partes: un cuerpu principal rectangular, otru d’idéntica forma que s’adelanta na fachada delantera hasta la medianera y un terceru nel estremu opuestu, muncho más pequeñu y nel que ta la puerta d’entrada. Los murios son de mampostería y lladriyu enllucíos y la cubierta, a doble vertiente. Cuenten amás con un xardín independiente pa cada casa, lo que-y da a tol conxuntu un ciertu aire llamaderu.

El resultáu ye un interesante xuegu de volúmenes creáu polos teyaos de los distintos elementos, más complexu que l’habitual forma prismática que presenten la mayoría de les viviendes d’esti tipu. Tán habitaes y en bon estáu, magar que se fixeren dalgunes reformes qu’alteriaron l’aspeutu orixinal.

La empresa construyó más inmuebles d’esti tipu, güei desapaecíos, n’El Puente de Sama, San Pedro y La Pola Llaviana. Sí sobreviven los que llevantó Hulleras del Turón en Cauxal (Mieres), que caltienen la so fisonomía primitiva.

Estes viviendes presenten unes carauterístiques peculiares dientro de la vivienda obrera n’Asturies, mui interesantes pol so orixe y por crear un conxuntu que ye’l postrer testimoniu de la primer gran promoción de la política social del Ferrocarril de Langreo.

Guillermo Bas Ordóñez