Puertu de San Esteban

Nel 1908 entra en funcionamientu’l Ferrocarril Vasco Asturiano ente Figareo y Fuso, permitiendo l’enllaz col tramu ente Uviéu y San Esteban que, cuatro años enantes, abriera. Esta apertura, xunto col ramal entre La Cuadriella y Figareo, permitirá a Hulleras del Turón unviar los sos carbones al traviés del Puertu de San Esteban que, realmente, acaba funcionando a manera de cai propiu de la compañía minera vasca. Y ye que les rellaciones ente la empresa ferrocarrilera y la hullera yeren mui intenses, teniendo a grandes capitanes de la industria vasca ente los sos aicionistes principales. 

Nun yera ésa la primer vegada que San Esteban acoyía funciones portuaries claramente industriales, yá que yá nos sieglos XVIII y XIX diferentes proyeutos procuraron aprovechar la ventaya de la so llocalización na desembocadura del industriosu ríu Nalón. Sicasí, nes décades primeres del sieglu XX esperimentó un impulsu nuevu y una tresformación determinante: muros dársenes, diques, cargaderos, grúes, ramales, edificios portuarios auxiliares… 

Ente los elementos valiosos del Patrimoniu Industrial que posee San Esteban pueden rescamplase trés. En primer llugar, les grúes, xoyes auténtiques construyíes por firmes como Babcock & Wilcox que constitúin la imaxe más identificable del conxuntu. En segundu llugar, los cargaderos, que suponen un exemplu escelente del desarrollu de les estructures de cargo partiendo del modelu de drops decimonónicos. Y, finalmente, los noráis, que presenten grabaes les firmes d’Hijos de Cortadi de Bilbao, La Maruca d’Avilés…

Bona parte de los elementos descritos caltiénense nel so llugar, contribuyendo a que l’aspeutu del puertu, lliberáu de trenes y carbón, sía más agradable al paséu y la visita, pero entovía con un imborrable aire industrial. Razones más que suficientes, esperamos, pa que nun futuru cercanu tenga la proteición que merez, al traviés d’una de les dos categoríes máximes que señala la norma rexonal en materia de Patrimoniu Cultural. 

Faustino Suárez Antuña