Puertu Vieyu

L’actividá esixía la tresformación de l’antigua dársena preindustrial pa convertila nun puerto capaz de facer frente a la evacuación del mineral, con una infraestructura apropiada pa la receición y el treslláu dende los centros de suministru, llocalizaos na Cuenca Hullera Central. Nel 1857 entraba en funcionamientu la terminal del Ferrocarril de Langreo y el cai del Carbón quedaba destináu a embarcar el mineral a los buques per aciu de drops. Una terminal nueva, la de la Compañía del Noroeste, establecíase nel 1874.

Col envís d’aumentar el tráficu marítimu, a lo llargo de la segunda metá del sieglu XIX socediéronse los proyeutos d’ampliación y renovación de les infraestructures. Asina, executábase’l dique esterior de Santa Catalina (1864) siguiendo’l proyeutu de Pedro Antonio de Mesa y ameyorábase l’área de servicios del muelle. Pocu tiempu depués s’aprobaba el proyeutu de modernización que, en rellación cola Compañía de Ferrocarriles del Noroeste, redautaba Salustio González Regueral (1871). La Sociedad de Fomento executaba nel 1885 un dique curvu al Oeste y, colos años, l’Espigón Central y dos dársenes. De forma paralela entamábense les campañes d’instalación de noráis, a cargu del inxenieru Fernando García Arenal. La proximidá tanto al puertu como al ferrocarril foi naturalmente un estímulu poderosu pal establecimientu de numberoses sociedaes dedicaes a actividaes como la construcción naval, la producción de lloza, los curtíos y la metalurxa.

Magar los proyeutos d’ameyoramientu, el puertu siguía padeciendo problemes estructurales –insuficiencia de calaos, de llinea d’atraque…– que determinaron el treslláu de los llabores a El Musel. A mediaos de la década del 1980 fíxose la so reconversión un espacio náutico-deportivu y llúdicu, esvaneciéndose como resultáu de l’actuación el so tradicional sabor pesqueru y industrial.

Natalia Tielve García