La minería del carbón d’hulla n’Asturies

Dicía Alejandro Aguado, primer Marqués de las Marismas del Guadalquivir y figura destacada de la industrialización asturiana del sieglu XIX, qu’onde hai carbón, hai de too. Y Asturies teníalo, amás d’otros recursos fundamentales pa la industria, como la madera o l’agua. Sobre estes bases construyó’l primer ferrocarril netamente industrial de la península, el Llangréu-Xixón, que fixo posible la primer gran siderurxa asturiana en La Felguera que, al empar, afaló la esplotación de la hulla, siguiendo métodos y téuniques netamente capitalistes.

Y ye que, magar el carbón se conocía de vieyo y les empreses dieciochesces –les Reales Mines de Llangréu, la Empresa d’El Nalón, y la Fábrica de Trubia– señalaren la potencialidá del mineral, nun sedrá hasta la segunda metá del XIX cuando guañe de la mano d’un sistema lliberal qu’empecipiaba a dar los sos frutos alministrativos y llexislativos, imprescindibles pal desendolque d’una industria nacional. Sicasí, sedrá nel sieglu XX cuando la minería asturiana conoza’l so gran desendolcu en dos circunstancies bien estremaes: na Primer Guerra Mundial, colos principales productores europeos sumíos na guerra; y na autarquía de la dictadura militar de Franco, cuando’l mineral asturiano foi insustituyible. Nestos periodos llevantaránse les más interesantes unidaes, como Sotón, María Luisa, San José, San Jorge, Polio…

Pero la minería nun se circunscribe a los espacios de producción, darréu que les empreses y el mesmu Estáu esplegaron una intensa política social que, sicasí, nun foi pa suplir los baxos salarios y les dures condiciones de trabayu, dexándonos conxuntos como Solvay, Arnáu, La Felguera o Bustiello.

El resultáu de too ello ye un pervalible Patrimoniu Industrial, onde los castilletes, auténticos xigantes de fierro varaos pola historia marquen unos territorios nos que xeneraciones d’homes y muyeres vivieron produciendo carbón pa España.